قرقر شعر سيد الموجى

حا يا قرقر كلها ساعتين ونوصل شد حيلك

الشاعر سيد الموجى

دا انت طول عمرك يا قرقر راضى و يايا بقليلك

يبقى ليه جى النهاردة تتقمص وتهز ديلك ؟

جر عربيتك و ياللا .. ولا يعنى عايزنى أشيلك ؟!

 **حا يا قرقر متناكفنيش جرى إيه يا ابن الحلال ؟

دانا مفطرتش يا قرقر و انت معلوف علفه عال

يبقى هل يرضيك كده نعطل و ما نأخدش المشال ؟

طب واجيت أكلك منين ، طب وأقول إيه لما نرجع للعيال ؟

حا يا قرقر دا انت عارف كل حاجة عن حياتي

دا أنا بحكيلك حاجات يمكن متعر فهاش مراتى

دا إحنا ع الحلوة وع المرة سوا سارحين يوماتى

برضه واقف ؟ برضه ها تسيبنى كدا لوحدى أهاتى ؟!

 **حا يا قرقر عيب عليك عطلتنا دى ، إخزى الشيطان

وإما نرجع .. لك على ، هازود المعلوم حفان

عارف انك م التعب هلكان وعيان من زمان

بس مش معنى كدا تسيبنى أرغى زى البغبغان !

 **برضه واقف ، طب ورحمة أمي وعلى الطلاق

بالتلاتة من مراتى بالله العظيم

هاسحب الكرباج ما خللي شبر من جسمك سليم

والمثل بيقول يا قرقر اتقى شر الحليم

برضه واقف ، لسه واقف يعنى مش ناوي تطاوعني

طب يا قرقر ، خد يا قرقر ……………………

يعنى ومشيت مستقيم !

عمري أقول عنك كدا هاتعيش بهيم وتموت بهيم

 **قرقر (!) انت زعلت منى طب خلاص حقك على

ما انت بتخلينى افرغ فيك همومي المتدارية

وانت عارف اللي زى حالاتنا إحنا الأرزقية

لو عطلتنا نجوع ، ونموت ، لا لنا معاش ولا حتى دية !

 **يبقى ليه تسيبنى كدا قدام حمير الناس أهينك

أو تخلى الناس تقول أنى أنا مش مالي عنيك

بس والعشرة يا قرقر بابقى حزنان حزن ياما

لما أشوف عرقك بيجرى وانت تعبان فوق جبينك

بس هاعمل إيه أديني باقول ف سرى الله يعينك

الحياة صعبة يا قرقر وإحنا ف الدينا ضحية

لما كرباجي بيهرى جتتك ف اللحظة ديه

أوعى تفتكر إن أدى منى شطارة وعنجهية

اللي فيك من هم عيشتك والله اكتر منه في

زى كرابيجنا إحنا ما بتسلخ جلودكو انتو الحمير

الزمان كرباج يا قرقر فوق ضهور العربجية !!

لقمة العيش مرة زى الصبر يا قرقر يا اخويا

وانت عارف انك انت كل ما ورثت من أبويا

كان بودي تكون طوالتك فيها أحسن صنف فول !

كان بودي كل ما تتمنى يا قرقر تنول

وانت عارف كل حاجة ع العموم من غير ما أقول

 **المهم الوقتي نوصل بالبضاعة في سلام

لجل نرجع بعشانا قبل ما الأولاد تنام

ساقية دايرة وإحنا فيها مربوطين على الدوام

أما إلف سيجارة أصل دماغي لفت م الكلام !!

الله (!) داحنا خلاص يا قرقر جينا عند المز لقان

وإحنا دايما موعودين بالركنة في هذا المكان

واللي جاى ع البعد تعرف إيه كمان ؟! قطر البضاعة

يعنى لو معدناشى فيها ركنه بالقليلة نص ساعة

طبعا المفروض بقى تعدى بسرعة المز لقان

بالسلامة ، شد حيلك ، هيلا ، ياللا القطر بان

ليه كده إتكعبلت ليه استر يا ساتر الله حي

شيلوا ويايا يا خلق يا ناس يا هوه ، القطر جى !!!

 

 

بابكى ليه ؟ بعد اللي صابنى بتسألونى بابكى ليه

هو فيه ف الدينا شيء غير الحمار أبكى عليه ؟!

طب يا ريت القطر كان خطى على رقبتي أنا

كان عيالي هيحزنولهم شهر أو حتى سنة

بس كانوا هيلقوا لقمتهم وتداروا ف دار

العيال ممكن يعيشوا بالحمار من غيري أنا

بس مش ممكن يعيشوا بى من غير الحمار !!!